ایس ایس پی پونچھ
POONCH MIRROR JANUARY 11, 2026
پونچھ (نمائندہ پونچھ مِرَر):سرحدی ضلع پونچھ میں سیکورٹی انتظامات کو مزید مستحکم بنانے کے لیے سینئر سپرنٹنڈنٹ آف پولیس پونچھ نے لائن آف کنٹرول کے قریب واقع سرحدی گاؤں سالوٹری میں حال ہی میں قائم کیے گئے بارڈر پولیس پوسٹ کا دورہ کیا۔ اس دورے کا مقصد سرحدی علاقوں میں نگرانی کے نظام کو مؤثر بنانا اور زمینی سطح پر سیکورٹی تیاریوں کا جائزہ لینا تھا۔
یہ نیا بارڈر پولیس پوسٹ ضلع پولیس پونچھ کی جانب سے ایک اسٹریٹجک اقدام کے طور پر قائم کیا گیا ہے، جس کا مقصد حساس سرحدی پٹی میں نگرانی کو مضبوط کرنا، علاقے پر مؤثر کنٹرول قائم رکھنا اور کسی بھی ہنگامی صورتحال میں فوری ردِعمل کی صلاحیت کو بڑھانا ہے۔ پولیس حکام کے مطابق اس پوسٹ کا قیام ضلع پونچھ کے مجموعی سیکورٹی ڈھانچے کو مضبوط بنانے کی سمت ایک اہم قدم ہے۔
دورے کے دوران ایس ایس پی پونچھ نے علاقے کی مجموعی سیکورٹی صورتحال کا تفصیلی جائزہ لیا اور بارڈر پولیس پوسٹ پر تعینات اہلکاروں سے ملاقات کی۔ انہوں نے اہلکاروں کی آپریشنل تیاری، زمینی حالات سے متعلق ممکنہ خطرات، موجودہ تھریٹ پرسیپشن اور نگرانی و گشت کے نظام کی کارکردگی کا باریک بینی سے معائنہ کیا۔ اس موقع پر سرحدی امن کے قیام اور مقامی آبادی کے تحفظ میں
بارڈر پولیس پوسٹ کے کردار کو نہایت اہم قرار دیا گیا
پولیس جوانوں سے خطاب کرتے ہوئے ایس ایس پی پونچھ نے مؤثر پولیسنگ کے بنیادی اصولوں پر زور دیا اور کمیونٹی پولیسنگ کو ناگزیر قرار دیا۔ انہوں نے اہلکاروں کو ہدایت دی کہ وہ مقامی عوام کے ساتھ قریبی رابطہ قائم رکھیں، کیونکہ مقامی لوگ جرائم کی روک تھام اور بروقت انٹیلی جنس معلومات کے حصول میں ایک اہم کردار ادا کر سکتے ہیں۔
ایس ایس پی پونچھ نے منشیات کی اسمگلنگ کے خلاف سخت کارروائی کی ضرورت پر بھی زور دیا اور اسے سرحدی علاقوں کے لیے ایک سنگین سماجی و معاشی خطرہ قرار دیا۔ اس کے علاوہ لائن آف کنٹرول کے پار سے کسی بھی ممکنہ دراندازی کی کوشش کو ناکام بنانے کے لیے مسلسل چوکسی اور مؤثر گشت کو لازمی قرار دیا گیا۔
یہ دورہ پولیس اہلکاروں کے حوصلے بلند کرنے کا باعث بنا۔ پولیس حکام کے مطابق جموں و کشمیر پولیس جدید سہولیات، مضبوط سیکورٹی نظام، مسلسل تربیت اور عوامی تعاون کے ذریعے ضلع پونچھ کی سرحدوں کو محفوظ بنانے کے لیے پوری طرح پرعزم ہے
Leave a Reply