قرآنِ پاک سے عملی تعلق ہی حقیقی کامیابی کی بنیاد ہے: مفتی سکندر خان ازہری
پُونچھ مِرَر نیوز ڈیسک مارچ 19,2026
پونچھ، نمائندہ پونچھ مرر// جامع مسجد سیڑھی چوہانہ میں ماہِ رمضان المبارک کے دوران تراویح میں ختمِ قرآنِ پاک کی تکمیل کے سلسلے میں ایک دینی اجتماع منعقد ہوا، جس میں علمائے کرام اور مقامی افراد کی بڑی تعداد نے شرکت کی۔ تقریب میں ڈائریکٹر مدارس اہل سنت صوبہ جموں، مولانا مفتی سکندر خان ازہری نے بطور مہمانِ خصوصی شرکت کی اور خطاب کیا۔ اس موقع پر خطیب پونچھ میر واعظ مفتی فاروق حسین مصباحی نے بھی اجتماع سے خطاب کیا، جبکہ مرکز اہل سنت جامع انوار العلوم شہر پونچھ کے مہتمم حافظ عبدالمجید مدنی کی دعا پر تقریب کا اختتام ہوا۔
اجتماع سے خطاب کرتے ہوئے مفتی سکندر خان ازہری نے قرآنِ پاک سے مضبوط تعلق قائم کرنے کی ضرورت پر زور دیا۔ انہوں نے کہا کہ جن گھروں میں قرآن کی تلاوت کی جاتی ہے وہاں روحانی فضا قائم ہوتی ہے اور یہ عمل انسان کی زندگی پر مثبت اثرات مرتب کرتا ہے۔ انہوں نے حدیثِ مبارکہ کا حوالہ دیتے ہوئے کہا کہ اللہ تعالیٰ قرآن کے ذریعے بعض لوگوں کے درجات بلند فرماتا ہے جبکہ اس سے دوری اختیار کرنے والے محرومی کا شکار ہو سکتے ہیں۔
انہوں نے اس بات پر زور دیا کہ قرآنِ پاک کو صرف مخصوص مواقع تک محدود نہیں کیا جانا چاہیے بلکہ اسے روزمرہ زندگی کا حصہ بنایا جانا ضروری ہے۔ ان کے مطابق باقاعدگی کے ساتھ کم مقدار میں تلاوت بھی اہمیت رکھتی ہے، اور اس پر عمل کرنا اصل مقصد ہونا چاہیے۔
مفتی ازہری نے علاقہ مکینوں سے خطاب کرتے ہوئے کہا کہ مقامی سطح پر دینی سرگرمیوں میں اضافہ ایک مثبت پیش رفت ہے۔ انہوں نے مسجد اور مدرسہ کے بانیان و ذمہ داران کی خدمات کا ذکر کرتے ہوئے کہا کہ ایسے ادارے معاشرے میں دینی تعلیم کے فروغ میں اہم کردار ادا کرتے ہیں۔ انہوں نے عوام سے اپیل کی کہ وہ زکوٰۃ و صدقات کے ذریعے دینی اداروں کی معاونت کریں تاکہ یہ سلسلہ جاری رہ سکے۔
انہوں نے بعض سماجی رسومات کے حوالے سے بھی گفتگو کرتے ہوئے کہا کہ دینی مواقع پر اصل توجہ قرآن خوانی اور ایصالِ ثواب پر ہونی چاہیے۔ انہوں نے اس بات پر زور دیا کہ قرآنِ پاک کی تلاوت کو اپنی روزمرہ زندگی کا حصہ بنایا جائے، چاہے اس کی مقدار کم ہی کیوں نہ ہو۔
اس موقع پر خطیب پونچھ میر واعظ مفتی فاروق حسین مصباحی نے اپنے خطاب میں علاقے میں دینی سرگرمیوں کے فروغ کا ذکر کیا۔ انہوں نے کہا کہ وقت کے ساتھ ساتھ یہاں دینی تعلیم کے مواقع میں اضافہ ہوا ہے اور مسجد و مدرسہ کے ذریعے بچوں کو دینی تعلیم فراہم کی جا رہی ہے۔ انہوں نے ادارے کے ذمہ داران کی خدمات کو سراہتے ہوئے کہا کہ یہ کاوشیں معاشرے کے لیے اہمیت رکھتی ہیں۔
انہوں نے عوام سے اپیل کی کہ وہ دینی اداروں کی قدر کریں اور اپنے تعاون کے ذریعے انہیں مزید مضبوط بنائیں۔ ان کا کہنا تھا کہ قرآن سے وابستگی انسان کی دنیاوی اور اخروی زندگی میں رہنمائی فراہم کرتی ہے، اس لیے نئی نسل کو بھی اس سے جوڑنا ضروری ہے۔
تقریب کے اختتام پر مرکز اہل سنت جامع انوار العلوم شہر پونچھ کے مہتمم حافظ عبدالمجید مدنی نے دعا کی، جس میں ملک و ملت کی سلامتی، امن و استحکام اور دینی اقدار کے فروغ کے لیے دعائیں کی گئیں۔ اس موقع پر علاقے کے معززین، علمائے کرام اور عوام کی بڑی تعداد موجود تھی
Leave a Reply